Манна барыта киэҥ нэлэмэн Сахабыт сирин улуустарыттан Дьокуускай куораттан, Үөһээ Бүлүүттэн, Бүлүүттэн, Өлүөхүмэттэн, Ньурба, Орто Халыма, Уус Алдан, Амма, Таатта, Сунтаартан  барыта  17 үлэ киирэн дьүүллүүр сүбэ сыанабылын ааста.

 Дьүүллүүр сүбэ састаабыгар Арассыыйа суруналыыстарын сойууһун, СӨ суруйааччыларын  сойууһун чилиэнэ Нанова-Солдатова Вера Спиридоновна, поэтесса Гаврильева Евдокия Тарасовна үлэлээтилэр.

     Дьүүллүүр сүбэ быһаарыытынан Кылаан кыайыылаах үрдүк аатын ылла Уус Алдан Түүлээх нэһилиэгин олохтооҕо Находкина Полина Пантелеймоновна – Полина  Победа,

1 үктэллээх диплом  – Козлова Вера Петровна – Туйгууна (Таатта Хара Алдан);

2 үктэл – Антонина Хобусарова (Үөдүгэй нэһилиэгэ, Үөһээ Бүлүү.);

3 үктэл – Софронов-Нутчин Николай Николаевич – Дьуур (Өлүөхүмэ улууһа, Кыыллаах арыы).

Анал ааттар:

Васильев Александр Михайлович (Ньурба улууһа, Чуукаар) – Иэйиилээх хоһоонньут

Никифоров Егор – Басхаай (Бүлүү улууһа, Тылгыны) –  Инникилээх хоһоонньут

Пестряков Василий Егорович. – Курбуһах Уола (Уус Алдан, Курбуһах) – Уран тыл ууһа     

  Күндү күрэс кыттыылаахтарыгар барыгытыгар көхтөөх кыттыыгыт иһин муҥура суох махтанабыт, инникитин айар аартыккыт арыллан истин, үөрүү-көтүү аргыстанан күн-дьыл өксүөнүн билбэккэ нус-хас олохтонуҥ, эстибэт эрчимнэниҥ,уһун дьоллоох олохтонуҥ.

ИЙЭБЭР

Күн тэҥэ мин күндү киһибэр,

Ийэбэр махталбын этэбин.

Күн сирин көрдөрбүт аанньалбар

Иһирэх тылларбын аныыбын.

Иҥэрбит эбиккин сүрэхпэр,

Эн холку амарах майгыгын.

Сүбэлээн эн этэр тылларгын,

Элэккэй үтүө да санааҕын.

Доҕорбун сүтэрбит кэмнэрбэр,

Эн үтүө сүбэһит буолбутуҥ.

Дьылҕабар ыарахан күннэрбин,

Эн тэҥҥэ үллэстэн кэлбитиҥ.

Саныыбын суохтуубун куруутун,

Эн истиҥ тылларыҥ иэйиитин,

Ийэкээм эн кэрэ мичээргин,

Эн ыраас үөрүнньэҥ дууһаҕын.

Күн тэҥэ ,мин күндү киһибэр,

Ийэбэр махталбын этэбин.

Аттыбар эн суоҕуҥ да иһин,

Сүрэхпэр куруутун эн бааргын.

    Туйгууна,Таатта.

Оҕо саас улдьаатын сүүрүгэр

Сүрэхпэр кистэммит тылларбын,

Күн күбэй тапталлаах ийэбэр

Ситэри эппэтэх эбиппин.

Ол эрэн тылларым тыыннаахтар

Сүрэхпэр күөдьүйэ сырдыыллар,

Күн аайы ахтабын ийэбин

Бу хоһоон тылларын тиһэбин.

Ийэккээм эйигин таптыырым

Өлүө диэн куттана саныырым,

Аһынан мин кистээн ытыырым

Түһэххэр мин умса түһэрим.

Оҕотук санаалаах буоламмын

Таптыырбын ситэри эппэтим,

Арчылыыр тылларгын истэрим

Сүрэхпэр иҥэрэн иһэрим.

Ситэри эппэтэх тылларбын

Эйигин олустук таптыырбын,

Сааһыран олорон ыллыыбын

Эн кутуҥ истиэ диэн санааммын.

Оо ийээ эйигин таптыыбын

Олуһун даҕаны суохтуубун,

Бу сэмэй тылларбын аныыбын

Ситэри эппэтэх тапталбын.

Н.Дьуур.

Пестряков Василий Егорович. – Курбуһах Уола.

Уус- Алдан оройуона Курбуһах  нэһилиэгэ

Ийэбэр аныыбын.

Ийэкэм эдэркээн бэйэтэ,

Иистэнэ олорон оргууйдук,

Иһигэр иэйэн, сэмээр ыллаан,

Иистэнэр массыыҥката тыаһаан.

Аскын астааҥҥын түбүгүрэн,

Аҕам кэлэн, үөрэ сэгэйэн,

Остуол тула бытырыыстанан,

Аһыырбыт олуһун астынан.

Оҕонньор буолан олороммун,

Оҕотук саастарбын ыатаран,

Олохтон эрдэ барбыт ийэм,

Олоҕун санаан, уйадыйан.

Уҥуохтаах – тирииҥ эрэ хаалан,

Көмүскэҥ уута куура хатан,

Кэриэс, бүтэһик эппит тылгын,

Кэллэҕим толорон барытын.

Үтүө – аймах дьонноох буоламмыт,

Оҕо иитэр дьиэҕэ ыыппакка,

Ийэлээх, аҕабыт олоҕор,

Олорон улааппыт эбиппит.

Алтыс кылаас, кыра киһичээн,

Аҕа – ийэ иитэр оруолун,

Дьоһуннук толору ылынан,

Балтыларбын көрөн – харайан.

Ийэкээм, эн сыллаан ылбыккын,

Билигин даҕаны саныыбын,

Иһирэх, үтүөкэн тылларбын,

Ийэбэр эйиэхэ аныыбын.

       Басхаай