Мария Игнатьевна Константинова – Өргүөккэ
Александр Семенов – Ырыа Сааска, сцена ветерана ахтыыта
Учуутал эдьиийим
Мин оҕо сааһым Өргүөт нэһилиэгэр Тойоку оскуолатыгар үөрэнэр кэмнэрбэр ааспыта. Оччоҕо бу аныгы курдук телевизор, музыкальнай инструменнар тыа сиригэр суох кэмнэрэ этэ. Киинэ көрдөхпүтүнэ ырыалаах буоллаҕына ону өйдөөн хаалан үтүктэн ыллыы сатыырым. Кыра кылааска үөрэнэ сырыттахпытына биһиэхэ Өргүөккэ клуб сэбиэдиссэйинэн Мария Игнатьевна Константинова диэн эдэр кыыс үлэлии кэлбитэ. Ийэм Екатерина Иудовна Семенова (Кэтириинэ) клубка остуораһынан үлэлиир этэ, онон клуб саҥа үлэһитигэр чугас сылдьар, баян, гармошка оонньотор тыастарын кэрэхсии истэр киһинэи буолбутум. Киэһэ аайы клуб дьиэтигэр репетиция бөҕөтө күөстүү оргуйбута, ыал ийэлэрэ, хаһаайкалар, эдэр комсомол ыччаттар ырыа-тойук бэлэмигэр
киэһэ аайы мустар буолбуттара.
Мария Игнатьевна оскуолаҕа ырыа учууталынан үлэлиирэ, уруок биэрэрэ. Районнай үөрэнээччилэр сааскы фестивалларыгар Тойоку оскуолатын концерда үрдүктүк сыаналаммыта. Мин Г.Никифоров мелодиятыгар «Эйэ, дьол иһин» ырыатын запевалалаан лауреат үрдүк аатын ылан грамотанан, сыаналаах бэлэҕи ылбытым. М.И.Константинова оскуолаҕа чуолаан ырыаҕа үөрэтэрэ, баяҥҥа, гармошкаҕа М.Николаева,эдьиийдии – балыстыы Зоя, Маруся Николаевалар оонньууллара, сынньалан: киэһэлэргэ үҥкүүгэ тыаһаталлара. Өргүөт нэһилиэгин культурнай олоҕо оччотооҕу кэмнэргэ сэргэхсийэ түспүтэ, ыччат кулуупка иккис дьиэтин курдук санаан түмсэр, оонньуур-көрүлүүр, үнкүүлүүр киинэ буолбута. Мария Игнатьевна ити үлэлиир кэмигэр сайынын окко сынньалаҥҥа ыччаты кытта ыллаан- туойан, дьону-сэргэни бэйэтигэр тардар күүстээх этэ. Бастыҥ сааһыт, кустуур, куобахтыыр этэ уонна фотограф бэрдэ этэ, ол түһэрбит хаартыскалара Өргүөт нэһилиэгэр ыал аайы бааллар. Билигин самодеятельнай композитор буолбут Владимир Васильевтыын дуэттаан кини баянын тыаһыгар уйдаран ырыа бөҕө ыллыырбыт. Оҕо сааспар ырыа алыбыгар ылларарбар, ырыаны олоҕум аргыһа оҥостубуппар эдьиийим курдук саныыр күндү киһим Мария Игнатьевна өҥөтө кэмэ суох, сүдү, кини ырыаларын ыллаһа, баяныгар үҥкүү бөҕөнү үнкүүлээбит аҕай учуутал эдьиийбинэн ааҕабын.
Кэлин улаатан баран Быракаан, Өргүөт клубтарыгар худруктуурбар Мария Игнатьевна культура отделын сэбиэдиссэйинэн улэлиирэ.
1970 сыл В.И.Ленин 100 сааһыгар Өргүөт СДК- та тыа сирин художественнай самодеятельноһын концертарын смотрыгар I миэстэни ылбыппыт, клубпутугар элбэх сыаналаах музыкальнай инструменнары, инвентары бириэмийэлээбиттэрэ, үөрбүппүтүөн, көппүппүтүөн эриэхсиэт! Оо, оччотооҕу ыччат ырыаҕа-тойукка, спортка көҕүн, үлэни-хамнаһы кыайарын билигин ахтан-санаан аастахха эчи кэрэтин. Нам нэһилиэгэр олорор кэммэр Мария Игнатьевна син биир кулууп тутаах үлэһитэ, музыкальнай инструментальнай оркестр тэрийэн, сайын отчуттарга, кыһын сүөһү үлэһиттэригэр «Кыһыл муннукка» ырыа – үҥкүү кэһиилээх күндү киһи буоллаҕа ээ. Концердынан гастроллаан Ньурбанан, Сунтаарынан, Бүлүүнэн Якутскай куоракка диэри аһаҕас грузовой массыынанан айаннаан «Исидор Барахов ыччата ыллыыр» девизтээх республикаҕа тиийэ биллибитэ, дьону-сэргэни сэргэхсиппитэ. Манна барытыгар М.И.Константинова өҥөтө улахан, кини ыччаты түмүүтэ, техникатын кэпсэтиитэ, үлэттэн көҥүллэтиитэ Мария Игнатьевна эппитэ этириэс, баҕарбыта туолар бастыҥ художественнай салайааччы, элбэх хору, ансамблы үөрэппит культура биир бэриниилээх байыаһа диэн сыаналыыбын. Мария Игнатьевнаны кытта 50 — 60 — 70 сс. ыллаабыт-туойсубут дьон күн бүгүнүгэр диэритин ыллаһа- туойса сырыттахпыт.
Ырыаҥ өссө да ыраахха диэритин ыллана туруохтун күндү киһибит, эдьиийбит Мария Игнатьевна!
Ытык Киһибит Эдьиий Морууса/Үөһээ Бүлүү улууһун культураҕа сайдыыга салаата;[хомуйан бэчээккэ бэлэмнээтэ В.В.Павлова].- Дьокуускай : АУ РС(Я) АРКТИКА РФЦ., 2014 .- 83 – 85 с.
